CrossSections | Башак Шенова

Недисциплинирани форми на знаење |  Интернационален симпозиум „Кураторски размени“ |  Презентација на Башак Шенова |  Музеј на современата уметност Скопје |  5 декември 2018, 20 часот

На 5 декември (среда), со почеток во 20.00 часот во Музејот на современата уметност во Скопје, ќе се одржи презентација и разговор со Башак Шенова, кураторка и дизајнерка.

Во скопје таа ќе го претстави проектот Crossections, интердисциплинарна платформа за уметничките истражувања, дијалозите и продукцијата. Во текот на три години (2017-2019), со учество на 19 уметници, овој проект планира соработка со научници, уметници и културни работници, одржувајќи групни и јавни состаноци, работилници, изложби, претстави и разговори ќе се одржат во Виена, Хелсинки и Стокхолм.

Резиденциски престој на Каталин Ердоди

Кураторски резиденцијален престој |  Каталин Ердоди |  Проектен простор Прес ту егзит |  19 ноември -17 декември 2018

На покана на Проектниот простор Прес ту егзит, а во рамки на програмата „Иницијатива за кураторски гостувања“ од 19 ноември до 17 декември, 2018 год. во Македонија престојува Каталин Ердоди (1980, Дебрецен, Унгарија). Таа е кураторка, истражувачка и културна работничка активна во полето на современата уметност и перформанс од 2004 година. Нејзината пракса се фокусира на интердисциплинарни соработки, политички ангажирани уметнички и кураторски стратегии, експериментални перформативни формати и уметност во јавен простор, во широка смисла разбрана како општествен, архитектонски и дискурзивен простор. Таа живее и работи во Виена.

За време на нејзиниот престој во Скопје, Каталин Ердоди ќе направи истражување базирано на практика кое е дел од нејзините докторски студии. Нејзиното истражување се однесува на постсоцијалистичката рурална состојба во Унгарија и во другите поранешни социјалистички земји, вклучувајќи ја и Македонија, осносно социо-економските, политичките и културните процеси на трансформација во руралните средини, со политичка транзиција од крајот на 80-те / почетокот на 90-те како пресврта точка. Таа ги испитува хетерогените и фрагментираните реалности на руралните промени - особено фокусирајќи се на трансформацијата на земјоделската работа, руралната егзистенција и секојдневниот живот - со помош на уметнички и кураторски стратегии поврзани со јавната уметност, уметничкото истражување и социо-политичкиот ангажман.

Илузии на уметноста

Нови проектни продукции |  Проект „Илузии на уметноста“ на Доротеј Нешовски |  Проектен простор Прес ту егзит |  3 -14 декември 2018, 10-15.00 и 20-22.00 часот

„Илузии на уметноста“ на Доротеј Нешовски (1988, Скопје) е истражувачки проект кој се занимава со концептите за креативна спонтаност, ликовнa артикулација, социјална инклузија, педагогија и апстрахирање на релацијата галерија-публика-уметник.

„Илузии на уметноста“ се реализираше во рамки на програмата „Нови проектни продукции“ на Проектниот простор Прес ту егзит и резултира со серија на објекти/слики, дигитални отпечатоци, цртежи, фото-документација и ефемерни интервенции во простор. Доживеани од авторот како „урбани визуелни и ментални графички мапи“ каде паралелно коегзистираат авторовите искуства со луѓе, состојби, енергии, простори, и случки, тие се слоевито градени со колоритен графички интензитет. Визуелно провоцирајќи и комуницирајќи со гледачот, тие го насочуваат погледот истовремено навнатре кон интимниот, но истовремено и нанадвор кон урбаниот простор.

Белинда Казим-Камински / Филмска проекција и разговор

Недисциплинирани форми на знаење |  Интернационален симпозиум „Кураторски размени“ |  Филмска проекција и разговор со Белинда Казим-Камински |  Музеј на современата уметност Скопје |  15 ноември 2018, 20 часот

Во четврток, на 15ти ноември со почеток во 20:00 часот, во Кино салата на Музејот на современата уметност во Скопје, ќе се одржи проекција на два краткометражни филма и разговор со Белинда Казим-Камински, уметница, истражувачка и писателка од Виена. Нејзин фокус на интерес се сеќавањето, траумата и црната радикална имагинација. Во моментот таа е докторски кандидат на PhD-in-Practice програмата при Академијата за ликовна уметност, Виена.

Во рамки на ова нејзиното прво претставување пред македонската публика, Белинда Казим-Камински ќе не запознае со нејзината истражувачка работа и уметничка практика преку прикажувањето на нејзините два краткометражни филма „Откопување. Во разговор“ (2017) и „Писмото“ (2018), по што ќе следи разговор со публиката.